إعرف حظك اليوم وتوقعات الأبراج معانا كل يوم وياريت متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل وسعادة..

: كلام جد

الريليشن شيب جولز بقت انك متحاولش تخش ف علاقة من اساسه.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

حظك اليوم برج الحمل دوت مصر
حظك اليوم برج الحمل دوت مصر

إعرف حظك اليوم برج الحمل الجمعة 20/10/2017 مع عبدالله أحمد..

الحمل: من 21 مارس إلى 19 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

روق على عواطفك النهاردة وإطلب الحب ومتتكسفش..دة حقك ف الحياة..القمصة والزعل والإشمئناط اخرتهم مش حلوة ومش هتعجبك ومش هتعرف تتعامل معاها..حاول تنجز ف امورك وتبطل تستنى كل حاجة تيجي بتزحف لحد عندك..الكرامة ملهاش علاقة بإحتياجات مشاعرك لا من قريب ولا من بعيد..الحب مش إهانة لشخصيتك سيادتك..مش إهانة أبدا..

برج الحمل عملياً

( الشغل والمذاكرة والتخطيط لبكرة ):

مش لازم تخرج النهاردة وتشارك العالم ف انشطته الدورية المتكررة المتشابهة المملة..مش ضروري ابدا طالما مش حابب تعمل كدة من جواك او حاسس انك مش مستعد..اقعد ف البيت براحتك.. المهم تقعد مبسوط..مش قاعد تخطط هتقول لأ على كام حاجة طول الاسبوع اللي جاي دة كله للناس..بلاش..بلاش.. كمان حاول تتفاءل حبة..البند دة مش إجباري ومش جاي ف اي امتحان.. بس لو عرفت تعمله هتبقى جبرت..يمكن تنبسط..مين عارف.

برج الحمل صحياً

( نفسيا وجسمانيا وكل مايخص طاسة المزاج ):

بتخطط لمصيبة ف السر وموفرلها كل طاقتك ولا مجرد مقرر انك تقعد متعملش اي حاجة من باب الكسل..امال لما الشتا يهجم هتعمل ايه يا صغنن..إتحرك ياجدع وخد حقك من بق الحياة..إتحرك وبطل كسوف.. الچيلي والشيكولاتة والحلويات بشكل عام هيعدلوا مزاجك النهاردة..حاول بس متعملش سطو مسلح على الفريزر وتقلب الشيكولاتة بتاعة حد عشان احتمال كبير يكون معمولك كمين كبير وانتا مش واخد بالك..

إعرف توافق برج الحمل مع باقي الأبراج النهاردة:

متوافق مع الابراج المستحية والفنكوشية والهوائية زي إمبارح

حظك اليوم برج الثور دوت مصر
حظك اليوم برج الثور دوت مصر

إعرف حظك اليوم برج الثور الجمعة 20/10/2017 مع عبدالله أحمد..

الثور : من 20 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

طلع مشاعرك من الفريزر النهاردة خصوصا وانك النهاردة بتميل للكسل ف كل حاجة على حس ان اليوم أجازة وكدة بس الحقيقي انه ولا اجازة ولا حاجة دة مجرد راحة من الشغل والمذاكرة والروتين مش أكتر..انما المفروض يبقى دة اليوم المخصص للحب ف الاسبوع كله بشكل صافي وحقيقي..

برج الثور عملياً

( الشغل والمذاكرة والتخطيط لبكرة ):

محتاج تنام النهاردة ف نص اليوم ساعة او ساعتين بعمق على انغام مزيكا هادية جدا يحبذ تكون كلاسيك.. لما تقوم من النوم بقى وتنزل الشارع تقعد ع القهوة او تشارك ف اي حاجة تخص البيت ياريت متنساش ان كلمة “حاضر” بتريح الناس..حتى لو مش هتعمل الحاجة اللي بتقول عليها حاضر دي.. تظل الكلمة دي بتريح وبتوفر جدال كتير جدا مالوش عازة.

برج الثور صحياً

( نفسيا وجسمانيا وكل مايخص طاسة المزاج ):

مترهقش نفسك ف شغل البيت او التنضيف والترويق..وراك حاجات اهم من النشاط المفرط دة..ثم ان الحاجات دي عاوزة طاقة كبيرة وانتا النهاردة ف الاغلب مكسل تتحرك من مكانك اساسا..الاسهل تخلص الحاجات دي كلها بدري بدري لو ضروري تعملها بحيث تفضى من العصر لبليل تروق على مزاجك وترش علي وشه كريمة واناناس وفراولة وكريز..تقدر تكافئ نفسك النهاردة على المجهود الفظيع دة سواء عملته او معملتوش بحتتين جاتوه..واحدة شيكولاتة والتانية كريمة..بلاش ميلفيه عشان بيعمل عكوسات ملهاش لازمة..

إعرف توافق برج الثور مع باقي الأبراج النهاردة:

متوافق مع الابراج التركوازية والنارية.

حظك اليوم برج الجوزاء دوت مصر
حظك اليوم برج الجوزاء دوت مصر

إعرف حظك اليوم برج الجوزاء الجمعة 20/10/2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً

( الكراش والإكس والبوي فريند والجيرل فريند والجوز والزوجة والقرايب ):

محتاج تحسم مابينك وبين نفسك مسائل معلقة كتير النهاردة على الجانب العاطفي وخصوصا انك مشغول بإنك تطلع صح وبس..حاول تصفي دماغك وتبسط الموضوع على نفسك وتسألها..هل انتا فعلا محتاج الحب ف حياتك ولا هو بالنسبالك مجرد مراية بتحب تشوف نفسك فيها جميل وأحسن واحد ف الدنيا وخلاص..

برج الجوزاء عملياً

( الشغل والمذاكرة والتخطيط لبكرة ):

التقوقع والهروب مش حل ف مواجهة مرازية الحياة خصوصا لو أدركت انها مجرد مرازية مؤقتة وليها وقت وهتنتهي فيه.. وخد بالك انك اتعودت متطلعش نفسك غلطان ف الحاجات اللي المفروض انك متحمل مسئوليتها وبشكل كامل ف حياتك لأنها ف الاساس نابعة من إختياراتك إنتا..حاول تخليك واقعي ومتبالغش.. ف الاخر كل حاجة بتعدي وانتا عارف كدة كويس.. ثق ف قوتك بس مش أكتر..

برج الجوزاء صحياً

( نفسيا وجسمانيا وكل مايخص طاسة المزاج ):

صحتك كويسة على عكس ماتعتقد تماما..حاول بس متنساقش ورا المخاوف اللي بيستثمرها بشكل ناجح اي حد مهتم بالإستفادة من فشلك اكتر من نجاحك ف الحياة..كمان ركز ف فترة الليل ف الحاجات اللي بتحبها مش ف الحاجات اللي انتا متهيألك انك بتحبها..جايز تنبسط..

تعرف على توافق برج الجوزاء مع باقي الأبراج النهاردة:

متوافق مع الابراج الهوائية والنارية

حظك اليوم برج السرطان دوت مصر
حظك اليوم برج السرطان دوت مصر

إعرف حظك اليوم برج السرطان الجمعة 20/10/2017 مع عبدالله أحمد..

السرطان: من 21 يونيو إلى 22 يوليو

برج السرطان عاطفياً

( الكراش والإكس والبوي فريند والجيرل فريند والجوز والزوجة والقرايب ):

الحرية النهاردة اهم بالنسبالك من المشاعر والحب والعواطف وكل الكلام دة تماما..إحتياجك للحرية بيتنامى جواك بقاله فترة وانتا اكيد ملاحظ دة بقوة..حاول تاخد اجازة من الحب من غير ماتفسد اي علاقة قائمة مابينك وبين طرف تاني خصوصا لو بيحبك بجد وبيقدرك بجد..حاول تريح حبة من غير ماتخسر او تاخد قرارات راديكالية مفاجئة مغايرة لطبيعتك..بإختصار حاول متبقاش آناني..حاول بشدة..

برج السرطان عملياً

( الشغل والمذاكرة والتخطيط لبكرة ):

متنشنش على خراب حياة حد..متشمتش ف حد.. مش قيمتك والله خالص..خليك زي مانتا كبير ف نفسك وميشغلكش ايه حصل لمين وليه ويستاهل ولا لأ..الدنيا دوارة والكوكب اللي انتا واقف على ارضه دلوقتي دة طول عمره بيلف ومبيوقفش لا لحد ولا عشان خاطر حد..ركز ف حياتك وبس النهاردة وخد بالك عشان فترة المساء والسهرة مهمة جدا الليلة.. ارجوك متضيعهاش فيما لا ينفع..

برج السرطان صحياً

(نفسيا وجسمانيا وكل مايخص طاسة المزاج ):

الليل فترة ملائمة للخروج والتواجد وسط التجمعات واللمة والصحبة الحلوة..مزاجك مهم وطاسة مزاجك اهم من اي حاجة ومن اي حد بالنسبالك..حاول متبينش دة بشكل فج للناس او تأكد عليه كتير ف الكلام بدون داعي..تقدر تنبسط من غير ماتضايق حد وتقدر برضة تتخلص من كل مخاوفك الليلة لو وقفت عملت لنفسك صنفين تلاتة من الأكل البسيط اللي انتا بتحبه..مجرد الوقفة والتعب والاهتمام والمكافأة هيرضوك نفسيا جدا..حاول بس متسيبش مواعين كتير ف الحوض لبكرة عشان منظرها الصبح هيبقى مش لطيف وممكن ينكد عليك بداية اليوم بدون داعي..

تعرف على توافق برج السرطان مع باقي الأبراج النهاردة:

متوافق مع الابراج النارية

حظك اليوم برج الأسد دوت مصر
حظك اليوم برج الأسد دوت مصر

إعرف حظك اليوم برج الأسد الجمعة 20/10/2017 مع عبدالله أحمد..

الأسد: من 23 يوليو إلى 22 اغسطس

برج الأسد عاطفياً

( الكراش والإكس والبوي فريند والجيرل فريند والجوز والزوجة والقرايب ):

مشاعر حارة ورغبة ف الحب مبيوقفش ضدها غير طموحاتك العملية اللي انتا معتقد انها اهم من اي حاجة حتى الحب او المشاعر..حاول توازن مابين قلبك وعقلك على قد ماتقدر لأن الحب والتحقق فيه ممكن يكون دافع ليك ف حياتك العملية بشكل انتا مش متخيله..محاولة الفصل مابين الجانبين ف معظم الأحوال هتعملك مشاكل كتير ف نفسيتك وهتحس فجأة انك مقصر ف جانب منهم ودة هيحسسك بالذنب وهيخليك تقاوم وتنكر او ببساطة هيخليك تبعد وتختفي من المشهد العاطفي لأنك مش قادر تواكب متطلباته..حاول توازن احسن بدل الصراع الخفي دة ما يبتدي يضايقك..

برج الأسد عملياً

( الشغل والمذاكرة والتخطيط لبكرة ):

هتواجه مشكلة النهاردة سخيفة بشجاعة وذكاء كالعادة.. حاول متضيعش فيها اليوم كله عشان في إنبساط خفي كبير جدا جدا حواليك وبيكمن ف ابسط التفاصيل..كل ماتبقى هادي ورايق وعندك استعداد للإنبساط الصافي كل ماهتشوفه وتكتشفه وبسهولة عجيبة..إستمتع.

برج الأسد صحياً

( نفسيا وجسمانيا وكل مايخص طاسة المزاج ):

الصحة كويسة بس محتاجة رياضة بشكل كبير..على الاقل عشان متتفاجئش بكرش بايخ يعكنن عليك حياتك ويجبرك تعمل دايت انتا مبتحبوش..المزاج ممكن يظبط مع المكرونة ومع الفراخ ودة جميل...كمان نفسك ممكن تهفك علي بصل وتوم..قشطة طبعا لأنهم حاجات مفيدة وبتدي الأكل رونق خاص..إلا لو مخطط تتباس..ساعتها ولا بصل هينفع ولا توم هيشفع..بس ممكن تاكل بقدونس براحتك..

تعرف على توافق برج الأسد مع باقي الأبراج النهاردة:

متوافق مع الابراج الترابية والحنجورية

حظك اليوم برج العذراء دوت مصر
حظك اليوم برج العذراء دوت مصر

إعرف حظك اليوم برج العذراء الجمعة 20/10/2017 مع عبدالله أحمد..

العذراء: من 23 اغسطس إلى 22 سبتمبر

برج العذراء عاطفياً

( الكراش والإكس والبوي فريند والجيرل فريند والجوز والزوجة والقرايب ):

روتين حياتك مش مديك فرصة تركز مع الحب الفترة دي بشكل كبير..حاول تخرج من الدايرة دي النهاردة ان امكن لأن اليوم مناسب للحب وللكلام عن الحب وللتعبير عن مشاعرك بشكل واضح ومفصل ودقيق..مهم تشوف طلبات مشاعرك ومهم تسمعلها الليلة..

برج العذراء عملياً

( الشغل والمذاكرة والتخطيط لبكرة ):

متتشحتفش عشان حد..إشغل نفسك بحياتك وبس.. انتا بالعافية يدوبك عارف تشيل هم همومك لوحدك اساسا.. مفيش مكان لهموم تاني إلا لو انتا ليك كيف تتنكد وخلاص.. إبعد عن الدراما وعاشقيها ومدمنيها بالمشوار..بلا وجع دماغ.. الجو حلو واليوم لطيف..اخرج ياجدع وإنبسط احسن.

برج العذراء صحياً

( نفسيا وجسمانيا وكل مايخص طاسة المزاج ):

صحتك الجسمانية بشكل عام كويسة بس ممكن تبقى افضل لو اهتميت حبة بتحسين نوعية أكلك اما بالنسبة لصحتك النفسية ففي قلق شاغل كواليس عقلك ومخليك مش قادر تثق ف الحياة او ف نفسك كما يجب وكما تستحق..المود لو اتعدل هتقدر تتكلم وتهزر وتضحك ويبقالك نفس تنبسط بشكل كبير وتخرج من الدايرة المقفولة الروتينية اللي حابسة رغباتك ومخلياك مش قادر تفرد جناحاتك النفسية وتطير..كمان ياريت متتعاملش مع الأكل على انه مجرد بنزين لجسمك..الأكل متعة وممكن تفتح مجال لكل حاجة حلوة لو اتظبطت واتنظمت وخصوصا لو بطلت ترازي معدتك وقولونك بالأكل المتعب ف الهضم..

تعرف على توافق برج العذراء مع باقي الأبراج النهاردة:

متوافق مع الابراج الهوائية والنباتية

حظك اليوم برج الميزان دوت مصر
حظك اليوم برج الميزان دوت مصر

إعرف حظك اليوم برج الميزان الجمعة 20/10/2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً

( الكراش والإكس والبوي فريند والجيرل فريند والجوز والزوجة والقرايب ):

علاقتك مع الطرف الاخر بيشوبها التوتر والقلق اليومين دول عشان انتا خايف من نفسك ومن تقلبات أحاسيسك انتا..مش منه هو..وطبعا انتا مش قادر توضح دة بشكل هادي ميعملش مشكلة او صدام ممكن يكلفك العلاقة كلها وانتا مبتحبش الخسارة.. بالتالي حاول متشغلش بالك اوي بالموضوع دة وسيب كل حاجة على حالها..حاولوا تخرجوا وتجددوا الحب اللي مابينكم بشكل عاقل وناضج شوية وفكك من الحلم الرومانسي الكامل اللي بتحلم دايما بيه عشان دة تطبيقه على ارض الواقع ف الكوكب دة بقى صعب جدا..لازم تقلل حبة من شروطك ف مواجهة زخم الحياة..للأسف لازم تعمل كدة..

برج الميزان عملياً

( الشغل والمذاكرة والتخطيط لبكرة ):

ابعد النهاردة عن الغموض والسواد والافكار السلبية.. اليوم مناسب للخروج وللزقططة تحت اي ظروف.. عاند نكد الحياة بالضحك والفرفشة وكل ما الحياة تكشر ف وشك إضحك ف وشها ورازيها وثق ان بكرة افضل وأحسن وأروق.. وأي حد نكدي يحاول يعوق مسيرة الزقططة بأوهامه السلبية دي قوله “بكرة مش ملك حد” وبس..ولا هو جايب نتيجة الحياة من الكنترول وإحنا منعرفش ولا ايه بالظبط.

برج الميزان صحياً

( نفسيا وجسمانيا وكل مايخص طاسة المزاج ):

فترة الليل مناسبة للخروج ومناسبة للأكل بشدة برضة..تقدر توازن مابين الحاجتين دول بشكل ميضرش إحتياجك للسهر والتنطيط ف الشارع ف كل حتة ومابين الدايت اللي من الانسب انك تبتدي تعتاد وجوده ف حياتك خصوصا والشتا داخل وجسمك هيعمل معاك ألاعيب كتير عشان يزقك تاكل اكتر من المعتاد..قال ايه عشان تعرف تتدفى..عموما تقدر تركز ف الاكل زي مانتا عاوز بس بلاش صواني او طواجن او محاشي ف فترة المساء والسهرة..خصوصا خصوصا قبل النوم مباشرة..

تعرف على توافق برج الميزان مع باقي الأبراج النهاردة:

متوافق مع الابراج الحنجورية والكتكوتية

حظك اليوم برج العقرب دوت مصر
حظك اليوم برج العقرب دوت مصر

إعرف حظك اليوم برج العقرب الجمعة 20/10/2017 مع عبدالله أحمد..

العقرب: من 23اكتوبر إلى 21 نوفمبر

برج العقرب عاطفياً

( الكراش والإكس والبوي فريند والجيرل فريند والجوز والزوجة والقرايب ):

الاجواء مناسبة جدا للمخمخة النهاردة ف مسألة العواطف والمشاعر ومناسب برضة تجاوب نفسك على سؤال مهم جدا لنفسيتك العاطفية..هل انتا بتحب كفاية ولا مبتحبش كفاية وهل انتا ف الحب بتدور على مصلحتك وبس وقتما يحلو ليك ولا انتا اوقات بتضحي وبتحب حتى ف الاوقات اللي ملكش فيها مزاج لحب عشان ترضي الطرف الاخر ف العلاقة؟..وكمان مهم تجاوب على سؤال أهم من كل دة..هل التضحية دي اساسا انتا بتعملها عشان تحسس نفسك بعدين انك ضحية ومظلوم ولا لأ..ثم ليه بتضحي من الاساس..ماتبسط امورك اكتر من كدة وتعتبر الموضوع منتهي طالما انتا مبسوط واللي بتحبه برضة مبسوط..ومن غير أفورة او دراما..

برج العقرب عملياً

( الشغل والمذاكرة والتخطيط لبكرة ):

دش طويل ومزيكا وفاكهة ودلع ورقص وينسون وأفلام قديمة كوميدية حلوة وناس بتعرف تنبسط بدون اي تعقيدات او شروط وبس النهاردة.. غير كدة متركزش مع حد ومتشيلش هم حد..إنتا مش ناقص هموم.. حاول تقلل حبة بس من رغبتك ف السف على الاخرين عشان دة تضييع وقت حقيقي مالوش اي تلاتين لازمة.

برج العقرب صحياً

( نفسيا وجسمانيا وكل مايخص طاسة المزاج ):

حاسس انك مطلوب منك تتخلى عن انانيتك وجنانك عشان ترضي الاخرين ودة مش مقبول بالنسبالك خالص..حاول تبدي شوية مرونة نفسية ولو على الاقل بالتمثيل لحد ما الأجواء تستقر وتقدر تكمل انانية وجنان براحتك..كمان لاحظ ان انتقادك لأخطاء الأخرين مبيداريش كفاية على أخطائك ودة مضر لصحتك النفسية وغالبا هيخليك مش تصاحب التلاجة ف الشتا اللي جاي.. لأ..دانتا ممكن تاكل التلاجة ذات نفسها..ف خلي بالك وإعقل كدة وخليك بسيط وعادل حبة..

تعرف على توافق برج العقرب مع باقي الأبراج النهاردة:

متوافق مع الابراج الفنكوشية والبرمائية والحنكوشية

حظك اليوم برج القوس دوت مصر
حظك اليوم برج القوس دوت مصر

إعرف حظك اليوم برج القوس الجمعة 20/10/2017 مع عبدالله أحمد..

القوس: من 22 نوفمبر إلى 21 ديسمبر

برج القوس عاطفياً

( الكراش والإكس والبوي فريند والجيرل فريند والجوز والزوجة والقرايب ):

إعتمادك على الحب كمصدر للسعادة بقى حاجة أوڤر ف حياتك ومحتاجة تتنظم وتتقنن عشان مترجعش بعدين تحس انك فجأة ف وسط الصحرا ومش عارف تتصرف..حاول تتصرف بالعقل حبة ومتبينش لحد انك بتحب او بتتحب..اما لو انتا لسة ف مرحلة البحث عن طرف اخر يشاركك نفس المشاعر اساسا..ف اليوم مناسب عشان تكمل بحث وبجدية وياريت برضة دة يتم بعقلانية ومتبقاش مدلوق زي طبق المهلبية..

برج القوس عملياً

( الشغل والمذاكرة والتخطيط لبكرة ):

إهدى على نفسك النهاردة حبة وركز مع الحب والمشاعر الهفهافة والكلام الحلو كدة وكبر دماغك من العالم وأحزانه.. اللي يعرف يقفش إنبساط اليومين دول فعلا شخص محظوظ.. إنبسط أحسن..

برج القوس صحياً

( نفسيا وجسمانيا وكل مايخص طاسة المزاج ):

محتاج تزود ساعات نومك ولو ساعة زيادة عشان تعرف تبقى مركز وانتا صاحي وفايق كدة وملعلع..كمان انتا محتاج تنام ف مكان هادي عشان تعرف تنام بعمق وياريت متبقاش الساعة اللي قبل النوم هي الساعة اللي انتا مقرر دايما تصفي فيها حساباتك مع نفسك وتفكر فيها ف كل مشاكلك..وقت النوم للنوم وبس..مفيش حل للمشاكل هيظهرلك بشكل سحري قبل النوم..الحلول ممكن تظهر بشكل سحري ف الأحلام وبس..عرفت ليه بقى لازم تنام..كمان حاول قبل ماتنام تضرب طبق مهلبية طالما جبنا سيرتها يمكن تنبسط..

تعرف على توافق برج القوس مع باقي الأبراج النهاردة:

متوافق مع الابراج النارية والهوائية والطينية

حظك اليوم برج الجدي دوت مصر
حظك اليوم برج الجدي دوت مصر

إعرف حظك اليوم برج الجدي الجمعة 20/10/2017 مع عبدالله أحمد..

الجدى: من 22 ديسمبر إلى 19 يناير

برج الجدي عاطفياً

( الكراش والإكس والبوي فريند والجيرل فريند والجوز والزوجة والقرايب ):

اليوم أجازة والجو فيه جميل جدا ومناسب تماما للأنتخة والكسل والتأمل..ياريت متفسدش اليوم الجميل دة بخناقة مع حد انتا بتحبه او معجب بيه لمجرد انك مش عارف تشوفه بسبب مشغوليات او دلع او الاتنين مع بعض..قدر ظروفه جايز يكون محتاج يقعد لوحده النهاردة ويختلى بذاته حبة..إستجدع معاه عشان يبقى في مجال يردهالك مستقبلا لما تتقوقع انتا او تختفي من المشهد الإجتماعي لأي سبب..

برج الجدي عملياً

( الشغل والمذاكرة والتخطيط لبكرة ):

مش لازم تسبق الناس ومش لازم تخش معاهم ف صراع.. تقدر تتحقق وتنجح وتنبسط من غير خناق خصوصا لو ركزت ف انك تكبر دماغك وتثق ف نفسك وف شطارتك.. كمان خد بالك ان اليوم هتحتاج فيه مهاراتك الإجتماعية بشكل كبير خصوصا ف البيت.

برج الجدي صحياً

( نفسيا وجسمانيا وكل مايخص طاسة المزاج ):

عندك طاقة كبيرة جدا فيما يخص البهجة تكفي توزعها على ناس كتير..المشكلة انك متعرفش بوجود الطاقة دي للأسف لأنك مشغول بالتفكير ف المشاكل والهموم وبتلوم على نفسك بزيادة خصوصا بالليل..مش كل مشاكل العالم انتا سببها ابدا ولا كل مشاكلك انتا برضة سببها..الحياة قاسية اليومين دول على الكل وإيقاعها سريع ومن الصعب انك تواكبه وف نفس الوقت تنبسط..إحتياجاتك المادية عاملالك قلق مستمر ودة مش مخليك عارف تخش ف حالة الرضا عن النفس..ريح من الجري حبة ووقف القلق وخد النهاردة وقتك الكافي ف الرحرحة والإنبساط..دة حقك ف الحياة يابرنس..متتخلاش عنه..

تعرف على توافق برج الجدي مع باقي الأبراج النهاردة:

متوافق مع الابراج اللولبية والمائية والهوائية

حظك اليوم برج الدلو دوت مصر
حظك اليوم برج الدلو دوت مصر

إعرف حظك اليوم برج الدلو الجمعة 20/10/2017 مع عبدالله أحمد..

الدلو: من 20 يناير إلى 18 فبراير

برج الدلو عاطفياً

( الكراش والإكس والبوي فريند والجيرل فريند والجوز والزوجة والقرايب ):

فترة الهدوء والإستكانة العاطفية لسة مكملة معاك غالبا النهاردة ودة جايز يحسسك حبة ان قلبك منمل او انك مش حاسس حاجة واضحة ناحية اي حد بس ف المجمل انتا هتستفيد من الهدوء اللي انتا حاسه ف المنطقة العاطفية دة بشكل ذكي وهتستغل المساحة اللي بتفضى عاطفيا يوم بعد يوم دي ف حاجات تفيدك عمليا ف حياتك ودة بصراحة ف حالتك انتا بس أهم من اي حاجة..

برج الدلو عملياً

( الشغل والمذاكرة والتخطيط لبكرة ):

إركن التوتر والقلق والمخاوف اللي بقيت تخترعها لنفسك على جنب وركز ف حاجة واحدة بس النهاردة..تطلع على سحابتك الخاصة ف خيالك وتقعد تسمع ف مزيكا وبس..فكك من اللي بيحصل تحت.. انتا وراك طاسة دماغ عالية لازم تتظبط ودي حاجة أهم من أي حاجة تانية ف الدنيا..كمان خد بالك انك أون تراك فيما يتعلق بالجانب العملي..جايز مشوش ومش فاهم اي حاجة من اللي بتحصل حواليك بشكل كلي بس مع الوقت هتاخد بالك ان الصورة الكاملة بتتجمع وبتتلون ف مصلحتك وبشكل كبير..كمل ومتسمعش لحد وثق ف إحساسك وحدسك وبس

برج الدلو صحياً

( نفسيا وجسمانيا وكل مايخص طاسة المزاج ):

متخترعش لنفسك مخاوف جديدة فوق مخاوفك السرية عشان كدة كتير بجد سواء على عقلك او قلبك او معدتك..ثم معدتك ملهاش اي ذنب ف اللي بيحصلك دة خالص..مش كل ما تتضايق تروح تفتح التلاجة وتحاول تبلع كل حاجة جواها..انتا كدة بتحل الأكل محل مشاعرك ودة مش تصرف صح وانتا عارف كدة كويس..إعقل وفرفش أحسن..كمان ركز ف انك تشرب سوايل كتير جدا النهاردة بعيدا عن الشاي والقهوة وياريت متنساش تكتشف مزيكا جديدة كعادتك ف كل حاجة حواليك..ياريت يعني..

تعرف على توافق برج الدلو مع باقي الأبراج النهاردة:

متوافق مع الابراج الخشبية والسلسيونية والترابية

حظك اليوم برج الحوت دوت مصر
حظك اليوم برج الحوت دوت مصر

إعرف حظك اليوم برج الحوت الجمعة 20/10/2017 مع عبدالله أحمد..

الحوت: من 19 فبراير إلى 20 مارس

برج الحوت عاطفياً

( الكراش والإكس والبوي فريند والجيرل فريند والجوز والزوجة والقرايب ):

الحب مش سلمة توصلك لسلمة أعلى ابدا ولو اتعاملت مع قلبك على الاساس دة هييجي عليك وقت وتحس انك معدتش عارف الفرق بين الحب الخالص الصافي من اي مصلحة والحب الطياري ابو مصلحة وشواشي..كمان خد بالك انك بتسعى دايما للسيطرة على الطرف الاخر ف اي علاقة ودة غالبا اللي بيبوظ كل حاجة..

برج الحوت عملياً

( الشغل والمذاكرة والتخطيط لبكرة ):

هدوء الأعصاب والروقان النهاردة هما اللي ممكن يعملوا لمزاجك الشخصي أحلى عنوان.. حاول بس تقلل من اهتمامك وتصنيفك لتفاصيل الاخرين الشخصية وانتا تستريح..كمان خد بالك انك لابد ف الدرة ف الجانب العملي وبتتفادى تماما اي مسئوليات حقيقية الا لو فيها مصلحة مباشرة ليك ودة خطر ولو اتكشف هيبقى الموقف مش لطيف..ف خد بالك وحاول تمثل انك بتعمل حاجة مفيدة بإخلاص أكتر من كدة..حاول بس ومتقلقش هتتوفق ان شاء الله..

برج الحوت صحياً

( نفسيا وجسمانيا وكل مايخص طاسة المزاج ):

خد بالك من صحتك جدا عشان عنكبوت الإكتئاب لو قفش ف شراشيب أفكارك السودة هيلبد وهيتمركز ومش هيسيبها ابدا..حاول تصفي نفسيتك من الشوائب وتبعد عن إدعاء العقل والمثالية..كلنا عارفين انك طايش زينا كلنا..بتمثل ليه بقى؟..الصحة النهاردة كويسة وممكن تستفيد من دة بشكل واضح ف اللعب او الجد او الحب..إستمتع

تعرف على توافق برج الحوت مع باقي الأبراج النهاردة:

متوافق مع الابراج البرمائية والفنكوشية