متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل..

: كلام جد

الفلوس تقدر تشتري أي حب طالما له سعر.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

حظك اليوم برج الحمل دوت مصر
حظك اليوم برج الحمل دوت مصر

إعرف حظك اليوم برج الحمل الجمعة 13 أكتوبر 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

يوم حلو النهاردة جدا ان شاء الله بس انتا محتاج بس تبطل تبكت ف نفسك وتلومها على كل حاجة عملتها ومعملتهاش..إرحم نفسك من التأنيب دة حبة

برج الحمل عملياً

( الشغل والمذاكرة والتخطيط لبكرة ):

محتاج تفكر قبل ما تعمل اي حاجة النهاردة بشكل متآني وبلاش سربعة وتسرع..متبقاش السكينة سرقاك كدة طول الوقت..كمان متاخدش كل حاجة على كرامتك طول الوقت وعدي وكبر دماغك..ياما دقت ع الراس طبول يامعلم والكبير ف نفسه بيفضل طول عمره كبير مهما الناس قالتله العكس

برج الحمل صحياً

( نفسيا وجسمانيا وكل مايخص طاسة المزاج ):

ضهرك تعب من الوقفة الغلط ومن القعدة الغلط برضة..حاول تهتم بالموضوع دة عشان تعرف تنبسط من غير منغصات النهاردة..كمان تقدر تبص لقدام النهاردة وتحلم بأيام افضل واجمل براحتك..اليوم مناسب للخيال جدا ودة هيفرق ف نفسيتك خصوصا لو في مزيكا حلوة كمان مع اكل بسيط ولطيف

إعرف توافق برج الحمل مع باقي الأبراج النهاردة:

متوافق مع الابراج المخملية

*****************************************************************************

حظك اليوم برج الثور دوت مصر
حظك اليوم برج الثور دوت مصر

إعرف حظك اليوم برج الثور الجمعة 13 أكتوبر 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول تبان طيب النهاردة ف عيون الناس والا هتقعد ف الاخر محتاس محتاس محتاس..كمان مهم جدا تعمل خير ف حد يستاهله النهاردة برضة..وراعي قلبك وروحك مع بعض مش بشكل منفصل عشان يبقى في عندك توزيع عادل للثروة النفسية

برج الثور عملياً

( الشغل والمذاكرة والتخطيط لبكرة ):

ف المرحلة الراهنة انتا محتاج تعوم ف الخيال اكتر من الانغماس بشكل محبط ف الواقع المحيط..

برج الثور صحياً

( نفسيا وجسمانيا وكل مايخص طاسة المزاج ):

متروحش ف حتة انتا مش عاوز تروحها النهاردة مع حد..متجبرش نفسك اساسا تعمل اي حاجة انتا من جواك مش عاوز تعملها..المهم انك متعلنش عن دة بشكل منفر او غاضب او يفتح باب لزعل او جدال مع حد عشان ضغطك ميعلاش بدون داعي

إعرف توافق برج الثور مع باقي الأبراج النهاردة:

متوافق مع الابراج الفنكوشية والترابية

*****************************************************************************

حظك اليوم برج الجوزاء دوت مصر
حظك اليوم برج الجوزاء دوت مصر

إعرف حظك اليوم برج الجوزاء الجمعة 13 أكتوبر 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً

( الكراش والإكس والبوي فريند والجيرل فريند والجوز والزوجة والقرايب ):

في اجواء مناسبة للزقططة والنعنشة هتهل على سماك النهاردة..ياريت تستغلها كويس ومتسيبهاش تعدي وانتا قاعد تتفرج عليها ف كسل وبرود وفكك من الاوهام اللي معششة ف دماغك دي خالص

برج الجوزاء عملياً

( الشغل والمذاكرة والتخطيط لبكرة ):

مش كل حاجة هتعوزها الحياة هتديهالك..ديل ويز إيت.. اوقات كتير جدا الحياة بتدينا الحاجات اللي احنا عاوزينها ف توقيتات مش مناسبة او متأخرة وبالتالي بنبقى خلاص..زاهدين فيها ومش عاوزينها وبنبقى عاوزين نقول للحياة "لأ..مش بمزاجك انتي"..بس مبنعرفش وبالتالي بنتضايق ونكتئب ونقفل من العيش والعيشة واللي عايشينها بدون اي داعي ف حين اننا لو فكرنا حبة هنكتشف ان الحياة لا هي شخص بيعاند فينا ولا هي اساسا مهتمة اذا كنا مبسوطين او مقموصين..الحل بسيط..الانبساط اللي يلوحلك ف الافق اجري وراه وخلاص..لو قفشته هيبقى اسمك انبسطت بعد جري وتعب ولو ممسكتوش مش هتزعل برضة لأنك على الاقل اتحركت من مكانك ومقعدتش تجتر ف احزانك ف استسلام وسكوت

برج الجوزاء صحياً

( نفسيا وجسمانيا وكل مايخص طاسة المزاج ):

الصواني النهاردة ممكن تشقلب مزاجك بشدة..خصوصا الصواني المعمولة باهتمام وحب..حاول بس تركز بالليل ف انك تكتب حبة خواطر وانطباعات عن رأيك ف الحياة..هتستريح حبة لما تعمل كدة..خصوصا لو عملت كدة قبل الاكل وبعده..وخد بالك من الفرق كويس لما تيجي تقارن بينهم بعدين عشان تعرف قد ايه الانسان ضعيف وهش وممكن اي حاجة بسيطة وتافهة زي الاكل تبسطه وتعدل مزاجه

تعرف على توافق برج الجوزاء مع باقي الأبراج النهاردة:

متوافق مع الابراج النارية

*****************************************************************************

حظك اليوم برج السرطان دوت مصر
حظك اليوم برج السرطان دوت مصر

إعرف حظك اليوم برج السرطان الجمعة 13 أكتوبر 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول متتكسفش الحياة النهاردة عشان هي كمان متتكسفش منك وتحرمك من انبساط جاي ف طريقك بسلاسة وسهولة ومش هيكلفك اي حاجة اكتر من حبة طاقة حركية وطاقة فرفوشية داخلية

برج السرطان عملياً

( الشغل والمذاكرة والتخطيط لبكرة ):

اللون الاسود النهاردة هيبقى جميل جدا عليك خصوصا بالليل..بالنهار لأ عشان ممكن يعمل عكوسات مش كويسة ف حظك اليوم وانتا اساسا مش ناقص عكوسات

برج السرطان صحياً

(نفسيا وجسمانيا وكل مايخص طاسة المزاج ):

اعمل لنفسك اكل ومتعتمدش على حد النهاردة ف الموضوع دة خالص..محدش هيعرف يظبطلك اكلك زيك..ثم انتا بتحب تقف تعمل لنفسك اكل مش لحد تاني..ودة بيفتن على طبعك الحقيقي بشكل كبير بس محدش بياخد باله..ماعلينا..نقي نوع اكل سهل تعرف تعمله وخلي بالك من نار البوتجاز خصوصا لو بتقعد ف البيت شعرك منكوش

تعرف على توافق برج السرطان مع باقي الأبراج النهاردة:

متوافق مع الابراج النارية

*****************************************************************************

حظك اليوم برج الأسد دوت مصر
حظك اليوم برج الأسد دوت مصر

إعرف حظك اليوم برج الأسد الجمعة 13 أكتوبر 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً

( الكراش والإكس والبوي فريند والجيرل فريند والجوز والزوجة والقرايب ):

إتطمن..الكوكب النهاردة بخير وكويس ولسة بيلف حوالين نفسه..متشيلش هم انتا بس وانبسط ومتقلقش نفسك بدون داعي..كل حاجة اندر كنترول ومش محتاجين مساعدتك ولا نصايحك ف اي حاجة..

برج الأسد عملياً

( الشغل والمذاكرة والتخطيط لبكرة ):

اشغل نفسك بنفسك مش بالناس النهاردة وحاول تنام حبة حلوين من نفسك وتطنش كل وش ودوشة العالم المحيط الكئيب الحزين دة..ثم حزين دة على نفسه مش عليك

برج الأسد صحياً

( نفسيا وجسمانيا وكل مايخص طاسة المزاج ):

الخضار والفراخ والنودلز كلها حاجات بتناديك وانتا مطنش وعامل نفسك مش سامع..كمان انتا محتاج فاكهة مبهجة من نوع تكون بتحبه متقطعة ف طبق بحيث تقدر تقعد ف البلكونة تتفرج ع الناس وتمز براحتك وتنقنق..حاول بس متحدفش اي قشر او بذر على اي حد وببلاش شر ومرازية..بلاش..

تعرف على توافق برج الأسد مع باقي الأبراج النهاردة:

متوافق مع الابراج الخشبية والهوائية

*****************************************************************************

حظك اليوم برج العذراء دوت مصر
حظك اليوم برج العذراء دوت مصر

إعرف حظك اليوم برج العذراء الجمعة 13 أكتوبر 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً

( الكراش والإكس والبوي فريند والجيرل فريند والجوز والزوجة والقرايب ):

قوم إعمل بارتي لبنات أفكارك النهاردة بدل مانتا قاعد كدة لا شغلة ولا مشغلة..

برج العذراء عملياً

( الشغل والمذاكرة والتخطيط لبكرة ):

القراية والفرجة على التليفزيون والانتخة بشكل عام النهاردة هتبقى حاجات كويسة بالنسبالك..كمان انتا محتاج تتفاجئ مفاجأة حلوة تنعنشك حبة..تنام جعان مثلا وتصحى تلاقي حد عاملك اكلة حلوة بتحبها تقوم تاكلها وتخش تنام تاني..حاجة ف السكة دي كدة يعني مش اكتر..

برج العذراء صحياً

( نفسيا وجسمانيا وكل مايخص طاسة المزاج ):

صحتك محتاجة اهتمام طبعا بس النهاردة اجازة من كل حاجة حتى الاهتمام بالتالي تقدر تعمل اي حاجة انتا نفسك فيها عشان تعرف تعيش مبسوط الاسبوع اللي جاي كله ومتقولش كان نفسي ف حاجة معرفتش اعملها ف الاجازة..اديك ف الاجازة..هتعمل ايه بقى اكتر من الاكل والنوم يافتك؟..

تعرف على توافق برج العذراء مع باقي الأبراج النهاردة:

متوافق مع الابراج الهوائية والبرمائية والبربءية (الابراج ذات البربء اللي لايمكن ترق)..

*****************************************************************************

حظك اليوم برج الميزان دوت مصر
حظك اليوم برج الميزان دوت مصر

إعرف حظك اليوم برج الميزان الجمعة 13 أكتوبر 2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً

( الكراش والإكس والبوي فريند والجيرل فريند والجوز والزوجة والقرايب ):

محظوظ بحب الكل ليك النهاردة..بس دة مش سبب ابدا لانبساطك..انتا من جواك عاوز تسيب كل حاجة وتهرب وبسرعة وحاسس ان الحب دة بقى ضغط ونقة وإلتزام انتا مش قده..كمان الحب الغامر دة بيحسسك انك لازم تبقى موجود ليهم وحواليهم..مش لنفسك ولا حوالين نفسك..فجأة بتحس انك فشلت ف انك تبقى محط الانظار والاهتمام بالحب دة وبقيت مجرد قمر بيدور ف فلك كوكب تاني اكبر وانتا مبتحبش الدور دة خالص مهما كان جميل ف شكله من برة بالنسبة للناس..انتا محتاج تبقى حر..دة كل اللي بتقوله لنفسك طول الوقت..

برج الميزان عملياً

( الشغل والمذاكرة والتخطيط لبكرة ):

اهتم جدا بأي تاسك وراك الاسبوع دة وخطط ودبر وتكتك ازاي تخلصه صح وبشكل مظبوط وناجح ومتألق عشان دي اهم حاجة بتعملها ف حياتك..متنساش دة حتى لو اليوم اجازة..فضي دماغك وروقها ودلعها بالمزيكا..مش ولع فيها بالنكد..

برج الميزان صحياً

( نفسيا وجسمانيا وكل مايخص طاسة المزاج ):

الخروج والزقططة مهمين جدا النهاردة زي مامهم برضة يبقالك وقت خاص لنفسك لوحدك بعيد عن دوشة الناس وكلامهم وتوقعاتهم وامالهم وأحلامهم فيك..

تعرف على توافق برج الميزان مع باقي الأبراج النهاردة:

متوافق مع الابراج الهوائية

*****************************************************************************

حظك اليوم برج العقرب دوت مصر
حظك اليوم برج العقرب دوت مصر

إعرف حظك اليوم برج العقرب الجمعة 13 أكتوبر 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً

( الكراش والإكس والبوي فريند والجيرل فريند والجوز والزوجة والقرايب ):

حاول متتنكدش النهاردة عشان الحياة عبيطة وبتحبك وبتموت فيك وممكن جدا توجب معاك وتعبرلك عن الحب دة ف صورة مساعدات نفسية وعينية عشان تتنكد اكتر وهتبقى ف الاخر فاكرة انها كدة تجاهك عداها العيب وقزح وحققتلك كل رغباتك الدفينة ف النكد..ف على ايه..حاول تبتسم وتفرفش وتخرج للعالم من القوقعة النفسية اللي انتا حابس نفسك فيها دي بدون اي داعي..اخرج للحياة وانبسط وبلاش تدور على الحب..سيبه هو يدور عليك ولو ليك نصيب فيه أكيد هتلاقيه..

برج العقرب عملياً

( الشغل والمذاكرة والتخطيط لبكرة ):

تقدر تحط النهاردة الخطوط العريضة لأهدافك المقبلة ف الفترة اللي جاية واللي غالبا بتتلخص ف حاجات بسيطة جدا ومن حقك بس انتا مش عارف تاخدها من الحياة عشان كل حاجة فجأة بقت غالبة وبعيدة وصعبة ومبتتكلمش لغة تقدر تفهمها او ترد عليها..

برج العقرب صحياً

( نفسيا وجسمانيا وكل مايخص طاسة المزاج ):

ابعد عن اللحوم النهاردة وركز ف الفاكهة وبلاش شيكولاتة بالليل او ايس كريم..النهاردة كل ماتبقى خفيف هتنبسط اكتر

تعرف على توافق برج العقرب مع باقي الأبراج النهاردة:

متوافق مع الابراج المستحية

*****************************************************************************

حظك اليوم برج القوس دوت مصر
حظك اليوم برج القوس دوت مصر

إعرف حظك اليوم برج القوس الجمعة 13 أكتوبر 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً

( الكراش والإكس والبوي فريند والجيرل فريند والجوز والزوجة والقرايب ):

في حد مراقبك من برة الكوكب النهاردة غالبا..طنش خالص واعمل نفسك متعرفش وحط السماعات ف ودانك واديها رقص ورازيه ف نفسيته جامد وبراحتك..يراقبك بتاع ايه فردة الكاوتش النايمة دة..

برج القوس عملياً

( الشغل والمذاكرة والتخطيط لبكرة ):

محتاج تطير مش تخرج للبراح وبس النهاردة..محتاج تنبسط وتزقطط وتفرفش فعلا مش هزار..اخرج من المود الكئيب وانبسط حبة بأي شكل يعجبك طالما مفيهوش اي اعتماد على مصادر خارجية خصوصا ف الدلع.. دلع نفسك بنفسك احسن وبلاش وجع دماغ

برج القوس صحياً

( نفسيا وجسمانيا وكل مايخص طاسة المزاج ):

كيرف الطاقة النهاردة ف العلالي ودة معناه انك جاهز لأي نشاطات تحب تمارسها وخصوصا النشاط الرياضي..ظبط بقى وجمع اصحابك على القهوة والعبوا طاولة ولا دومنة او الاتنين مع بعض..براحتكوا..اهم حاجة متتخانقوش

تعرف على توافق برج القوس مع باقي الأبراج النهاردة:

متوافق مع الابراج الهوائية

*****************************************************************************

حظك اليوم برج الجدي دوت مصر
حظك اليوم برج الجدي دوت مصر

إعرف حظك اليوم برج الجدي الجمعة 13 أكتوبر 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً

( الكراش والإكس والبوي فريند والجيرل فريند والجوز والزوجة والقرايب ):

اليوم مناسب للحب..ومناسب برضة للخروج..بالتالي انتا تقدر تظبط وتخرج مع اللي بتحبه او بيحبك النهاردة تشموا هوا على اي كوبري خصوصا بعد العصر كدة بحيث تكون الشمس هديت ورغبتكوا ف الخناق والنقار والجدال مع بعض انبطت واتبطتت خالص

برج الجدي عملياً

( الشغل والمذاكرة والتخطيط لبكرة ):

مهم النهاردة تقعد متعملش اي حاجة من اي نوع..ياترى هتقدر تعمل كدة ولا لأ؟..مسيرنا نشوف واليوم طويل وكل حاجة مسيرها تبان حتى الحاجات اللي انتا فاكر انك مخبيها عن الناس او عن نفسك..كل هيبان..كله هيبان..

برج الجدي صحياً

( نفسيا وجسمانيا وكل مايخص طاسة المزاج ):

عاوز بهجة يبقى تسقى رجليك ف طبق مية سخنة نص ساعة..دة حق من حقوق رجليك عليك على فكرة..خصوصا وانك طول الاسبوع اللي فات عمال تمشي وتتحرك وتعبت رجليك معاك فعلا..دلعها عشان الرجلين دي اساس الجسم ومن غير انبساطها مش هتقدر تتحرك بشكل كويس وهتحس بخشونة ف الرومان بلي بتاع وسطك وبالتالي دراعاتك هتخدل وهتبقى اميل للنوم منك للصحصحة والبحث عن الانبساط..بالتالي لازم تقتنع ببساطة ان رجليك هي مفتاح الانبساط النهاردة

تعرف على توافق برج الجدي مع باقي الأبراج النهاردة:

متوافق مع الابراج النارية

*****************************************************************************

حظك اليوم برج الدلو دوت مصر
حظك اليوم برج الدلو دوت مصر

إعرف حظك اليوم برج الدلو الجمعة 13 أكتوبر 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً

( الكراش والإكس والبوي فريند والجيرل فريند والجوز والزوجة والقرايب ):

امشي ورا احساسك النهاردة ف كل حاجة خصوصا ف الحاجات المحيرة والحاجات اللي مش عارف تاخد فيها قرار او الحاجات اللي انتا اساسا مقرر متاخدش فيها قرار وتسيبها كدة تمشي على هواها زي ماتحب وبراحتها..كمان خد بالك ان مفيش حاجة مهمة النهاردة تستدعي منك اي اهتمام غير انك تبقى كويس ومبسوط وبتنام كويس وبتقوم فاكر احلامك او على الاقل حتت منها..اوعى بس تسيبها تتوه..اوعى.

برج الدلو عملياً

( الشغل والمذاكرة والتخطيط لبكرة ):

كل حاجة ماشية زي الفل انتا بس اللي من جواك شاكك ف كل حاجة عشان مش مصدق انك ممكن فعلا تنجح او تعمل حاجة عشان مبتثقش ف نفسك بشكل كافي كمان واضح انك محاط باشخاص محبطة وفقيرة ف خيالها ومشاعرها..حاول تبعد عن كل الهم دة وتقعد على سحابتك الشخصية فوق لوحدك حبة النهاردة..

برج الدلو صحياً

( نفسيا وجسمانيا وكل مايخص طاسة المزاج ):

سندوتشاتك وميتك وفاكهتك وحبة ترمس كدة وتطلع على السحابة تشغل مزيكا وتنبسط وبس..وتفكك من اي تهيوءات عند اي حد او توقعات..بطل تخاف على زعل ناس مبتخافش على زعلك..بطل الهبل دة خالص عشان دي مش جدعنة ولا تفهم..دة اسمه هبل حضرتك وطيبة محدش يستاهلها اساسا..

تعرف على توافق برج الدلو مع باقي الأبراج النهاردة:

متوافق مع الابراج الدخانية

*****************************************************************************

حظك اليوم برج الحوت دوت مصر
حظك اليوم برج الحوت دوت مصر

إعرف حظك اليوم برج الحوت الجمعة 13 أكتوبر 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً

( الكراش والإكس والبوي فريند والجيرل فريند والجوز والزوجة والقرايب ):

دلع مزاجك النهاردة باهتمام اكبر من امبارح حبة عشان مقاومة الحياة النهاردة ازيد من امبارح حبة وهتحتاج مجهود عشان تشق لحظك اليوم طريق يقدر يمشي فيه بأمان من غير ماحد يخطفه او يساومه او يتخيل انه من حقه يقررلك مصيره ومصيرك بالتبعية..فرفش ومتاخدش حاجة على صدرك

برج الحوت عملياً

( الشغل والمذاكرة والتخطيط لبكرة ):

واضح انك واقع تحت تهديد ما بيستهدف حلم من احلامك البسيطة للسيطرة على العالم..اتقل حبة يمكن التهديد دة يختفي من نفسه ومتحتاجش تواجهه او تتخانق معاه ف اي شارع ضلمة زي مانتا متوقع..اتقل حبة ومتبادرش بأي تصرف عدواني عشان هتتفاجئ..اهدى كدة وكن اليومين دول لحد مانشوف هنعمل ايه ف الموضوع دة واحدة واحدة..

برج الحوت صحياً

( نفسيا وجسمانيا وكل مايخص طاسة المزاج ):

السمك والفراخ النهاردة مناسبين جدا للمعركة اللي بتخوضها مناعتك ضد الميكروبات والذكريات اللي من زمن فات.. واللي واضح ان نشاطها زايد الفترة دي..

تعرف على توافق برج الحوت مع باقي الأبراج النهاردة:

متوافق مع الابراج المائية

*****************************************************************************