متاخدش الكلام على صدرك..ف الأول والأخر انتا اللي بتعمل حظك اليوم وكل يوم بتصرفاتك ف الحياة ومينفعش حد يقولك هتبقى مبسوط النهاردة أو لأ إلا انتا..إنتا بس اللي تقدر تحدد دة اليوم وكل يوم..متنساش دة..صباحك فل..

: كلام جد

هنفضل لأمتى بنحب فكرتنا عن الناس أكتر مابنحب الناس ذات نفسها.

عشان تعرف حظك بشكل كامل .. صفي نيتك ودوس على اسم برجك بإيدك اليمين.

حظك اليوم برج الحمل دوت مصر
حظك اليوم برج الحمل دوت مصر

إعرف حظك اليوم برج الحمل الخميس 12 أكتوبر 2017 مع عبدالله أحمد..

الحمل: من 21 مارس إلى 20 ابريل

برج الحمل عاطفياً

( الكراش والإكس والبوي فريند والجيرل فريند والجوز والزوجة والقرايب ):

حنية قلبك هي السر النهاردة ف نجاحك ف الحياة..شجعها واستخدمها بعقل وعدل وإنصاف..

برج الحمل عملياً

( الشغل والمذاكرة والتخطيط لبكرة ):

مهم متبخلش على اي حد بالمساعدة خصوصا لو يستاهل وجدع.. كمان مهم تكابر وتعاند وتتمسك بأفكارك ف الجانب العملي طالما واثق انك صح..متخليش حد يفتيلك ف اللي بتعمله..اللي مش عاجبه يقعد يشتغل ولا يذاكر بدالك من سكات وميعملش قلق كتير..

برج الحمل صحياً

( نفسيا وجسمانيا وكل مايخص طاسة المزاج ):

صحتك محتاجة اهتمام طبعا خصوصا وانك اوقات بتهمل ف الاكل النوعي النضيف وبتتجه بنفسك وذاتك لأكل الشارع.. ياريت متعملش كدة الليلة..مش هنخلص من التلاجة يطلعلنا أكل الشارع..راعي صحتك عشان كدة هتتعب..

إعرف توافق برج الحمل مع باقي الأبراج النهاردة:

متوافق مع الابراج المخملية والهوائية والترابية

*****************************************************************************

حظك اليوم برج الثور دوت مصر
حظك اليوم برج الثور دوت مصر

إعرف حظك اليوم برج الثور الخميس 12 أكتوبر 2017 مع عبدالله أحمد..

الثور : من 21 ابريل إلى 20 مايو

برج الثور عاطفياً

( الكراش والإكس والبوي فريند والجيرل فريند والجوز والزوجة والقرايب ):

متعاندش بشكل أوفر ف الحياة النهاردة لأنك هتبقى عامل بالظبط زي اللي سايق على مية وستين ف طريق صحراوي ضلمة وقافل الازاز وضارب النور العالي ومش واخد باله ابدا انه ماشي عكس..

برج الثور عملياً

( الشغل والمذاكرة والتخطيط لبكرة ):

بلاش عند النهاردة خالص..خليك مرن مرونة كبيرة وواسعة لدرجة السلسيون ياريت..

برج الثور صحياً

( نفسيا وجسمانيا وكل مايخص طاسة المزاج ):

كمان انتا محتاج تمارس رياضة التأمل حبة النهاردة مع حبة زومبا او ايروبكس..اي حاجة مش هتفرق..المهم تمارس شوية نشاط يخرجوك من حالة التصلب والتجمد اللي انتا حاسسها ف نخاشيش مشاعرك دي وبتحاول تداريها كأنها حاجة تكسف متفهمش ليه

إعرف توافق برج الثور مع باقي الأبراج النهاردة:

متوافق مع الابراج النارية والهوائية

*****************************************************************************

حظك اليوم برج الجوزاء دوت مصر
حظك اليوم برج الجوزاء دوت مصر

إعرف حظك اليوم برج الجوزاء الخميس 12 أكتوبر 2017 مع عبدالله أحمد..

الجوزاء: من 21 مايو إلى 20 يونيو

برج الجوزاء عاطفياً

( الكراش والإكس والبوي فريند والجيرل فريند والجوز والزوجة والقرايب ):

إركن العواطف النهاردة حبة وفكر كويس هتتصرف إزاي ف المشاكل اللي عندك..مهم تبقى هادي ومتآني خصوصا لو هتاخد اي قرار يتعلق بمستقبلك النهاردة..حاول متستعجلش او تقع فريسة لإفتراضات مش حقيقية بلا اي دليل يدعمها على ارض الواقع..

برج الجوزاء عملياً

( الشغل والمذاكرة والتخطيط لبكرة ):

حاجة حلوة جاية ف طريقك النهاردة..جايز تكون بسيطة ومش متكلفة اوي بس هتفرحك حبة حلوين لو خدت بالك منها..بالتالي انتا محتاج تبقى مركز ومصحصح لكل حاجة هتحصل حواليك النهاردة..وكمان مهم متقعدش ف البيت كتير النهاردة

برج الجوزاء صحياً

( نفسيا وجسمانيا وكل مايخص طاسة المزاج ):

ومهم برضة مترغيش ف التليفون كتير ومتمشيش ف ضل حد..ضلك كافي ويفيض وبراحه ملكك لوحدك ويستاهل تمشي وراه وبثقة اكتر من اي حاجة تانية.

تعرف على توافق برج الجوزاء مع باقي الأبراج النهاردة:

متوافق مع الابراج النباتية والحنجورية والهوائية زي إمبارح بالظبط

*****************************************************************************

حظك اليوم برج السرطان دوت مصر
حظك اليوم برج السرطان دوت مصر

إعرف حظك اليوم برج السرطان الخميس 12 أكتوبر 2017 مع عبدالله أحمد..

السرطان: من 21 يونيو إلى 20 يوليو

برج السرطان عاطفياً

( الكراش والإكس والبوي فريند والجيرل فريند والجوز والزوجة والقرايب ):

بالتأكيد مفيش حاجة ف حياتك أهم منك مفيش كلام..بس خد بالك ان في فرق بين الاهتمام بالنفس وبين الانانية..الفرق دة واسع وكبير زي اي فرق جميل ف سنان الحياة..

برج السرطان عملياً

( الشغل والمذاكرة والتخطيط لبكرة ):

ممكن تحس بالانبهار المؤقت الليلة ف مواجهة حاجات كتير مفاجئة..إستمتع وبراحتك.. اللون التركواز والأزرق المكتوم ممكن يعملولك عكوسات انتا ف غنى عنها..بلاش منهم وركز مع الطبيخ الليلة احسن.

برج السرطان صحياً

(نفسيا وجسمانيا وكل مايخص طاسة المزاج ):

الطبيخ الليلة هيبقى صديقك الصدوق لو حبيت..هيسمعك وهيطبطب عليك بحنية وتفهم وإحتمال كمان يحللك مشاكلك..

تعرف على توافق برج السرطان مع باقي الأبراج النهاردة:

متوافق مع الابراج المائية والنارية

*****************************************************************************

حظك اليوم برج الأسد دوت مصر
حظك اليوم برج الأسد دوت مصر

إعرف حظك اليوم برج الأسد الخميس 12 أكتوبر 2017 مع عبدالله أحمد..

الأسد: من 21 يوليو إلى 20 اغسطس

برج الأسد عاطفياً

( الكراش والإكس والبوي فريند والجيرل فريند والجوز والزوجة والقرايب ):

قلبك محتاج يتدلع يامعلم وبشدة..طول مانتا قافل عليه كدة مش هتفلح.. خرجه حبة من الكتمة دي ومشيه حبة ف اي جنينة يمكن تنبسط..

برج الأسد عملياً

( الشغل والمذاكرة والتخطيط لبكرة ):

كمان الطفل اللي جواك محتاج يلعب النهاردة اي العاب بسيطة وتافهة ومفيهاش اي تفكير او ارهاق ذهني او عاطفي..

برج الأسد صحياً

( نفسيا وجسمانيا وكل مايخص طاسة المزاج ):

الصحة بمب واي حد بيقول غير كدة هو اكيد شخص مهتم يطلع عليك إشاعات مغرضة عشان يقلقكك..انتا وميكروباتك زي الفل وبصحة وسلامة..خد بالك بس من ركبك النهاردة حبة ومتطلعش ع السلم ادوار كتير عالية.

تعرف على توافق برج الأسد مع باقي الأبراج النهاردة:

متوافق مع الابراج النارية والخشبية

*****************************************************************************

حظك اليوم برج العذراء دوت مصر
حظك اليوم برج العذراء دوت مصر

إعرف حظك اليوم برج العذراء الخميس 12 أكتوبر 2017 مع عبدالله أحمد..

العذراء: من 21 اغسطس إلى 20 سبتمبر

برج العذراء عاطفياً

( الكراش والإكس والبوي فريند والجيرل فريند والجوز والزوجة والقرايب ):

كفاية عمق عشان تعرف تتنفس وتعيش..كفاية عمق عشان تعرف تتعايش مع كل الاشخاص اللي مش عميقة اللي متنطورة حواليك ف كل حتة..

برج العذراء عملياً

( الشغل والمذاكرة والتخطيط لبكرة ):

مهم تتماهى مع الظروف ومهم تنزل حبة من عليائك وتتعامل مع جموع الشعب العامل وتنخرط ف صناعة الحياة اليومية وبقلب ومن غير حذر او خوف..

برج العذراء صحياً

( نفسيا وجسمانيا وكل مايخص طاسة المزاج ):

انتا تقدر تتعامل وتنبسط ف وسط اي ظروف او مكان لو حبيت..انوي انتا بس وصفي نيتك وكل حاجة هتبقى ألسطة بالقشطة.. وبالمرة دلع نفسك ف سندوتش سكلانس طالما جبنا سيرة القشطة.

تعرف على توافق برج العذراء مع باقي الأبراج النهاردة:

متوافق مع الابراج الطينية.. والهوائية برضة بس نص نص

*****************************************************************************

حظك اليوم برج الميزان دوت مصر
حظك اليوم برج الميزان دوت مصر

إعرف حظك اليوم برج الميزان الخميس 12 أكتوبر 2017 مع عبدالله أحمد..

الميزان : من 23 سبتمبر إلى 22 اكتوبر

برج الميزان عاطفياً

( الكراش والإكس والبوي فريند والجيرل فريند والجوز والزوجة والقرايب ):

الطريق اللي انتا ماشي فيه اخرته وحشة خلي بالك..روق تفكيرك حبة وبلاش سربعة وضغط على مشاعرك بدون داعي..خف عشان تعرف تعوم ف بحر الحياة..خف تعوم

برج الميزان عملياً

( الشغل والمذاكرة والتخطيط لبكرة ):

خليك حذر ف كلامك وتصرفاتك وألوانك النهاردة وحاول تداري الحيرة الفظيعة دي اللي واكلة دماغك اليومين دول بدون اي داعي..انتا مش مضطر ابدا تحتار بالعكس.. انتا ممكن تسيب كل حاجة تبانلك مع الوقت وتبطل استعجال وجري.. كمان حاول النهاردة متهتمش اوي لآراء الناس ف حياتك لآنه محدش هيعرف يعيشها ويفهم تفاصيلها إلا اللي عايشها وبس..

برج الميزان صحياً

( نفسيا وجسمانيا وكل مايخص طاسة المزاج ):

بالليل وقت مناسب النهاردة للزقططة والخروج بشرط انك تبعد عن اي نوع من انواع النقاش اللي ممكن يودي لسكة النكد..بلاش ياصغنن..بلاش.

تعرف على توافق برج الميزان مع باقي الأبراج النهاردة:

متوافق مع الابراج الحنكوشية والمعدنية..الترابية مش اوي النهاردة بس ماشي حالها

*****************************************************************************

حظك اليوم برج العقرب دوت مصر
حظك اليوم برج العقرب دوت مصر

إعرف حظك اليوم برج العقرب الخميس 12 أكتوبر 2017 مع عبدالله أحمد..

العقرب: من 21 اكتوبر إلى 20 نوفمبر

برج العقرب عاطفياً

( الكراش والإكس والبوي فريند والجيرل فريند والجوز والزوجة والقرايب ):

قدامك طريق طويل كبير ف نهايته طريقين صغنتتين.. طريق منهم بيودي ف اتجاه السعادة والبساطة والصراحة مع النفس وطريق تاني بيودي ف طريق المثالية والسيطرة.. حاول تختار صح..

برج العقرب عملياً

( الشغل والمذاكرة والتخطيط لبكرة ):

كل حاجة ماشية زي السكينة ف الحلاوة..ونجاح وتألق وتميز ماشاء الله ولا حول ولا قوة إلا بالله..داري على نجاحك بقى لتتحسد

برج العقرب صحياً

( نفسيا وجسمانيا وكل مايخص طاسة المزاج ):

اهتمامك الزايد بالدايت هيخليك تتجاهل مزاجك وف نفس الوقت طناشك ليه هيحسسك بالذنب..انتا محتاج توصل لحل وسطر ف الموضوع دة بشكل عاجل وتحسم بالظبط انتا عاوز تنبسط ولا تخس..كمان متستلفش من حد اي حاجة النهاردة.

تعرف على توافق برج العقرب مع باقي الأبراج النهاردة:

متوافق مع الابراج المستحية والفنكوشية والهوائية

*****************************************************************************

حظك اليوم برج القوس دوت مصر
حظك اليوم برج القوس دوت مصر

إعرف حظك اليوم برج القوس الخميس 12 أكتوبر 2017 مع عبدالله أحمد..

القوس: من 21 نوفمبر إلى 20 ديسمبر

برج القوس عاطفياً

( الكراش والإكس والبوي فريند والجيرل فريند والجوز والزوجة والقرايب ):

احترس من الناس اللي بتحاول تمارس عليك اي سلطة من اي نوع النهاردة..انتا اساسا بتداري احساسك الدفين بالخنقة ومش ناقص..

برج القوس عملياً

( الشغل والمذاكرة والتخطيط لبكرة ):

حاول تبعد وتخرج وتشم هوا ومتسيبش حد يسيطر عليك.. يوفر طاقته ونصايحه لنفسه..ثم مفيش حد فتك اوي لدرجة انه يبقى جايب نتيجة الحياة من الكنترول..ف فكك وكبر دماغك وخلي نفسيته وعقده تاكله..

برج القوس صحياً

( نفسيا وجسمانيا وكل مايخص طاسة المزاج ):

الليل فترة هدوء ورحرحة وبحث عن المصلحة.. إهتم بنفسك وبسعادتك..دة حقك..دة حقك.

تعرف على توافق برج القوس مع باقي الأبراج النهاردة:

متوافق مع الابراج النارية والهوائية والبرمائية

*****************************************************************************

حظك اليوم برج الجدي دوت مصر
حظك اليوم برج الجدي دوت مصر

إعرف حظك اليوم برج الجدي الخميس 12 أكتوبر 2017 مع عبدالله أحمد..

الجدى: من 21 ديسمبر إلى 20 يناير

برج الجدي عاطفياً

( الكراش والإكس والبوي فريند والجيرل فريند والجوز والزوجة والقرايب ):

في فرق كبير جدا بين انك تحب حد حب عاطفي وانك تحسسه انك امه وتبتدي بناءا على الاحساس المشوش دة تعامله على انك وصي عليه وعارف مصلحته اكتر منه..

برج الجدي عملياً

( الشغل والمذاكرة والتخطيط لبكرة ):

العقل بيقول بلاش والمنطق بيقول برضة لآ بس انتا ولا بيفرق معاك وهتكمل ف الوصاية دي ف حين انك المفروض تاخد بالك من نفسك عشان في عواصف نفسية جاية ف الطريق ومعاها زوابع وتوابع ف اتجاه المنابع.. حاجات كتيرة من اللي انتا شايل همها ومخوف نفسك منها جدا كلها ممكن تغرق ف اي إنبساط برئ بشراشيب..عرفت ليه مهم تنبسط بقى.

برج الجدي صحياً

( نفسيا وجسمانيا وكل مايخص طاسة المزاج ):

اليوم ملائم ومناسب للبيتزا وللفطير بشكل عام..خد بالك بس من ان الجو ممكن يبقى ساقع حبة بالليل..دفي قلبك كويس..

تعرف على توافق برج الجدي مع باقي الأبراج النهاردة:

متوافق مع الابراج النارية والهوائية

*****************************************************************************

حظك اليوم برج الدلو دوت مصر
حظك اليوم برج الدلو دوت مصر

إعرف حظك اليوم برج الدلو الخميس 12 أكتوبر 2017 مع عبدالله أحمد..

الدلو: من 21 يناير إلى 20 فبراير

برج الدلو عاطفياً

( الكراش والإكس والبوي فريند والجيرل فريند والجوز والزوجة والقرايب ):

قلبك محتاج براح وراحة..إمنع الحب اليومين دول خالص..انتا محتاج دايت لقلبك يامعلم بشكل عاجل

برج الدلو عملياً

( الشغل والمذاكرة والتخطيط لبكرة ):

واضح انك معرض للخطف على ايد فضائيين بيراقبوك بقالهم فترة من برة كوكب الارض..عموما انتا بالذات متقلقش خالص من الموضوع دة.. الفضائيين لو خطفوك صدقني كلها اسبوع ويرجعوك تاني ومعاك إعتذار رسمي منهم انهم فكروا ف يوم يهوبوا من كوكب الارض او منك انتا شخصيا..كمان خد بالك عشان في عكوسات محلية وعالمية وتيارات هوا وكوابيس وتفاصيل كتير جدا كلها مش مهمة بالنسبالك وتقدر تطنشها وتكمل عوم ف وسط السحاب ف احلامك..إستمتع.. لأنك ببساطة صح وجدا.

برج الدلو صحياً

( نفسيا وجسمانيا وكل مايخص طاسة المزاج ):

ركز ف الخضار والفاكهة وحبة رز صغنتتين او مكرونة..بلاش مسبك ومحمر ومشمر..خصوصا ف فترة المساء والسهرة..لو حسيت بالجوع ممكن تلجأ للنقنقة او تسقية الباتون ساليه ف الشاي ولو مبتحبش الباتون ساليه يبقى تسقي فايش (توست محمص بلدي لونه اصفر كدة وبيقرمش) وأمرك لله..

تعرف على توافق برج الدلو مع باقي الأبراج النهاردة:

متوافق مع الابراج المائية والدخانية

*****************************************************************************

حظك اليوم برج الحوت دوت مصر
حظك اليوم برج الحوت دوت مصر

إعرف حظك اليوم برج الحوت الخميس 12 أكتوبر 2017 مع عبدالله أحمد..

الحوت: من 21 فبراير إلى 20 مارس

برج الحوت عاطفياً

( الكراش والإكس والبوي فريند والجيرل فريند والجوز والزوجة والقرايب ):

عواتطفك ( العواتطف دلع عواطف) محتاجة تتصنفر بصنفرة خشابي وبعد كدة تاخد وش مبدئي كدة وبعد كدة تقدر تدهنها براحتك..مهم تسيبها تنشف الأول كويس..خصوصا قبل أول ماتدهن اول وش..

برج الحوت عملياً

( الشغل والمذاكرة والتخطيط لبكرة ):

الأحمر ف العادي لون خطر وبينبأ بحدوث حاجات مش كويسة ومفاجئة وخطيرة بس النهاردة الكلام دة مش هيمشي..حظك اليوم مرتبط ارتباط وثيق باللون الأحمر ومهم تمشي ورا اللون دة ف كل حاجة النهاردة حتى ف الأكل..

برج الحوت صحياً

( نفسيا وجسمانيا وكل مايخص طاسة المزاج ):

كمان الكوسة والبتنجان هيبقوا فال حلو ف بداية اليوم..وبلاش ضحك ف وش الأعداء خالص ياريت.. كمان هتكشف حاجة مهمة الليلة.. إستعد.

تعرف على توافق برج الحوت مع باقي الأبراج النهاردة:

متوافق مع الابراج الترابية والفنكوشية والخشبية

*****************************************************************************