سي إم بانك.. "معدي الناس" بشهرته ومدي الـ"WWE" على قفاه

نبتدي منين الحكاية.. حدوتة طويلة لسه نهايتها متكتبتش.. كان مصارع صالات وميادين.. لحد ما وصلت شهرته لدرجة عدت شهرة اتحاد "wwe" ذات نفسه.. وبقى مصارع ومقاتل في اليو إف سي وإعلامي وراعي برامج كتيرة.. وليه لأ؟.. ده ملك الكاريزما وبطل العالم في التحفيل والتخبيط في الحلل.. اسمه فيل بروكس.. لكن اسم شهرته اللي كله يعرفه وبيهتف بيه لحد النهارده هو "سي إم بانك"..

سي إم بانك
سي إم بانك

اتولد في شيكاجو بولاية إلينوي.. بدأ مصارعة وهو عنده 11 سنة.. بشكل غريب وعجيب.. تاتهوهات وحلقان وملابس غريبة.. لعب في كل مكان.. صالات جيم ومراكز مصارعة مش قانونية وشوارع وميادين.. والغريب إنه خلال الفترة دي لاعب ناس كتير من مشاهير المصارعة وكانوا كلهم لسه عيال ومغمورين.. زي دانيال براين ودولف زيجلر.. لكنه قعد فترة طويلة مدمن خمور.. وده كان معروف عنه من زمان.. لحد ما قدر يتخلص من ده ويركز في مجال المصارعة ..

سي إم بانك وهو صغير
سي إم بانك وهو صغير

لعب فترة طويلة في اتحاد رينج أوف أونر من أواخر التسعينات وكان معاه صديقه كولت كابانا.. وسنة 2005 سي إم بانك انضم للدبليو دبليو إي.. وخد أكتر من حزام.. من بطولة القارات "الإنتركونتيننتال" لحد حزام الوزن الخفيف "الكروزر" اللي الاتحاد لغاه فترة وبعدين رجعه تاني من قريب.. لكن أهم حزام خده بانك في الفترة دي كان حزام الإي سي دبليو.. أيامها طبعا كان الحزام ده جامد جدا وكانت الناس بتعشق مباريات الإي سي دبليو بسبب العنف والضرب والتكسير والشقلبظات وحركات "الهاي ريسك".. المهم عشان منخرجش من موضوعنا هنبقى نتكلم عنه في موضوع تاني لوحده..

سي إم بانك معاه الحزام
سي إم بانك معاه الحزام

في 2009 سي إم بانك عمل فرقة أو نقدر نقول إنها كانت رابطة.. اسمها المجتمع الصحي "ستريت إدج سوساييتي".. لا للكحوليات أو المخدرات أو التدخين.. وكان معاه راجل وست بس في الرابطة دي.. الراجل كان لوك جالوس المصارع اللي مشي ورجع تاني من فترة وعمل فرقة تاج تيم.. والبنت محدش سمع عنها في مجلة ميكي.. وفي 2010 مسك بانك فرقة نيكسس الشهيرة.. وأثبت في كل وقت إنه قائد ممتاز و"ليدر باي إيكسامبل"..

سي إم بانك وستيف أوستن
سي إم بانك وستيف أوستن

2011 بقى كانت التغيير الأكبر في مسيرة بانك.. اللي بدأ فيها يعادي اتحاد الدبليو دبليو إي.. سواء سيناريوهات أو حقيقي.. الموضوع بدأ لما بانك قعد على الأرض قدام مدخل المصارعين في نهاية عرض رو وخبط في الحلل جامد.. لأنه ساعتها هاجم جون سينا وهالك هوجان والروك وقال عنهم إنهم بيتمحلسوا لفينس ماكمان عشان يبقوا كبار ويخدوا بطولات.. وكمان قال إنه أحسن مصارع في العالم والوحيد في الاتحاد اللي مش بيتفرض عليه سيناريوهات معينة..

"أنا هاخد الحزام وامشي وممكن ألعب في اليابان أو أرجع تاني للرينج أوف أونر.. ماكمان مليونير المفروض يبقى بليونير.. عارفين ليه هو مش بليونير؟.. لأنه محاط بشوية أغبياء وأفاقين وبيوافقوه على كل حاجة.. وممكن كان يبقى حال الاتحاد أحسن لو ماكمان مات.. لكن برضه هيمسك الاتحاد بعدها بنته المجنونة أو جوزها المتخلف أو أي حد من العيلة الغبية.. خلينا أحكيلكم قصة شخصية عن فينس.. واحنا بنعمل حملة إعلانية حصل إن ......".. وهوبا الميكروفون اتفصل.. طبعا مهو مينفعش يقول الكلام ده على الهوا.. إزاي ياجدع؟.. لكن مسكتش برضه.. وقام وشاور للكاميرا وزعق وقال "أنا اللي بقول ده من دماغي يابشر".. وساعتها ششششششششش الإرسال قطع..

الأسبوع اللي بعده بانك مطلعش وساعتها الناس هتفت باسمه وشتمت ماكمان.. اللي كان شكله زي الزفت.. ومستحملش هجوم الجماهير.. وقالك ياعم الشركة هتخسر والأسهم هتقع.. لأ نرجع سي إم بانك وخلاص.. وفعلا رجع وكان مأزق كبير للاتحاد لأنه هيلاعب جون سينا على الحزام وهو مجددش عقده.. يعني هياخد الحزام ويخلع.. ماكمان حاول يتفاوض معاه في مرة على الهوا وكان أكبر غلط.. لأن بانك قفشه وطلعه على المسرح.. وقاله بالنص: "أنا عاوزك تعتذرلي وتنفذلي طلباتي كلها".. كان عاوز طيارة خاصة.. وهدوم وشرابات عليها اسمه.. وآيس كريم باسمه برضه.. وفيلم بيتكلم عنه.. ويبقى اسمه شابرون 2.. على اسم فيلم تريبل إتش اللي نزل وقتها وفشل.. وقال إن فيلمه هيبقى مختلف لأنه هيبقى مشهور ومسلي وناجح.. وفضل ياعم الحج يلقح في الكلام لحد ما سينا طلعله واشتبك معاه.. قام بانك قاله إنت عاوز تبوظ المفاوضات ياسينا؟ أدي المفاوضات باظت إهي ارتحت؟

مفاوضات سي إم بانك مع ماكمان
مفاوضات سي إم بانك مع ماكمان

بعد ماتش جامد ما بينهم.. سي إم بانك كسب الحزام من سينا وأحرج الاتحاد.. ومشي فعلا فترة.. وبعدين رجع تاني بس كان نفس حزامه مع سينا برضه.. ولاعبوا بعض تاني وبرضه بانك كسب.. يعني خد سينا رايح جاي..

سي إم بانك وهو بيفنش سينا
سي إم بانك وهو بيفنش سينا

سي إم بانك شال حزام بطولة الدبليو دبليو إي أكتر من أي حد في تاريخ الاتحاد.. وفي تاريخ أي اتحاد رياضي أصلا.. قعد معاه أكتر من سنة كاملة.. وتحديدا 434 يوم.. لحد ما الروك خده منه في مواجهة كبيرة ما بينهم.. وطول الفترة دي وحتى من بعدها وبانك كان فرخة بكشك عند الاتحاد.. ووصل لدرجة إنه كان أشهر من الاتحاد نفسه.. وكان فيه ناس بتتفرج على المصارعة علشانه هو بس..

وهو معاه حزام الوورلد شامبيون
وهو معاه حزام الوورلد شامبيون

سي إم بانك اللي عمره 38 سنة دلوقتي كانت دماغه لاسعة.. وناس كتير كانت متوقعة إنه يمشي من الاتحاد من فترة طويلة لإنه مكنش مرتاح.. وأولهم بول هايمان لأنه هو اللي جابه أصلا.. واللي خافوا منه حصل.. 27 يناير 2014 بعد عرض الرويال رامبل بانك اختفى.. وعمل مشكلة جامدة جدا للدبليو دبليو إي.. كانت أول مرة تحصل في الاتحاد.. وكانت المشكلة إن عقده لسه فاضل عليه شهرين.. فمكنش حد متوقع ولا محضر لرحيله.. طبعا إدارة الاتحاد كالعادة سكتت ومجبتش سيرة حاجة خالص.. والناس تهتف باسمه كل أسبوع وتبوظ مناقشات وماتشات.. لكن الإحراج وحش.. والاتحاد مكنش عارف يعمل ايه.. لكن طبعا رغم هتافات الجماهير والفراغ اللي سابه بانك العجلة دارت والدنيا مشيت.. لأن الناس مدمنة على مشاهدة الدبليو دبليو إي من زمان.. لكن محدش نسي سي إم بانك خالص وفضل مولع السوشيال ميديا لحد يومنا ده.. والناس بتتابع أخباره..

"إي ويل نيفر إيفر ريترن تو دبليو دبليو إي أجين".. على جثتي أرجع اتحاد المصارعة تاني.. ده كان كلام سي إم بانك في لقاء له ببرنامج.. ودي كانت الناهية بعد الكلام الكتير اللي الناس قالته في الموضوع ده.. ده من جهة بانك.. من جهة الاتحاد بقى فمسحوا كل حاجة تخصه من الأرشيف بتاعهم.. وبطلوا يجيبوا سيرته خالص.. كأنه مكنش موجود من الأصل.. لو دخلت سرشت على سي إم بانك على موقع الاتحاد مش هتلاقي نتايج خالص.. وهتلاقي إعدادت السيرش بتقول "ديد يو مين سي إم جانك"؟.. تقصد زبالة سي إم؟.. معلش معذورين برضه.. القفا اللي خدوه مكنش سهل وخدوا الضربة بجد..

حركة زبالة من اتحاد المصارعة
حركة زبالة من اتحاد المصارعة

المكسب الكبير أوي لبانك من المصارعة كان جوازه من أيه جيه لي.. بطلة الوومنز شامبيون واللي كانت دماغها لاسعة زيه بالظبط ومشيت بعده بشوية من الاتحاد بس بشكل ودي.. بعدها بفترة راح "اليو إف سي" اتحاد الفنون القتالية المختلطة.. وطبعا رحبوا بيه وقالوله ويلكم يافنان.. لأنه مشهور جدا جدا وانضمامه يعني فلوس وربح.. وقعد فترة طويلة يتمرن تقريبا سنتين وأكتر.. وجه معاد النزال بتاعه وكان مع المخضرم مايكي جال في 10 سبتمبر 2016.. واللي خد بطولة العالم كزا مرة.. لكن بانك خسر في النزال ده بفارق كبير واتبهدل.. ورغم كده برضه الناس هتفت باسمه.. وساعتها في وسط الأكوتاجون عيط بانك من التأثر وقال إنه مقدر حب الجمهور وهيرجع يقاتل تاني وتالت ومش هيبطل قتال ابدا..

سي إم بانك ومواجهته في اليو إف سي
سي إم بانك ومواجهته في اليو إف سي

سي إم بانك بيخاطب الجمهور بعد خسارته
سي إم بانك بيخاطب الجمهور بعد خسارته

ورغم مرور 4 سنين تقريبا على استقالته من الدبليو دبليو إي.. ورغم انضمامه لليو إف سي.. برضه لسه الناس بتهتف باسمه في عروض الرو الأسبوعية.. "سي إم بانك.. ويي وونت بانك.. جيف أس بانك"..

بانك وصديقه كولت كابانا
بانك وصديقه كولت كابانا

هو ومراته إيه جيه لي
هو ومراته إيه جيه لي

التخبيط في الحلل
التخبيط في الحلل

سي إم بانك وصحابه
سي إم بانك وصحابه

بانك وبروك ليسنر
بانك وبروك ليسنر

بانك في الأوكتاجون
بانك في الأوكتاجون

بانك وجيركو
بانك وجيركو

إتش وبانك وناش صورة تاريخية
إتش وبانك وناش صورة تاريخية

سي إم بانك وتريبل إتش
سي إم بانك وتريبل إتش

سي إم بانك بيستعرض في اليو إف سي
سي إم بانك بيستعرض في اليو إف سي

لو عجبك الموضوع ده وحابب تقرا مواضيع زيه أو أحسن خش هنا

قط بلدي

"بانكسي" اتقبض عليه يارجالة.. تعرف مين ده؟ تعالى وأنا أقولك